وليه تسكتى زمن ..اتكلمى!!

النهاردة بس قررت أخرج من سجن الاعاقة واحرر نفسى من قيودها..النهاردة بس قررت أنهى استسلامى لها وأتمرد و أقول كفاية تعبت .. ليه دايمآ حاسه بالعجز وعدم الثقة بالنفس لدرجة انى حتى خايفة أقول اللى جوايا ؟ ليه بسمح للأحاسيس السلبية والانكسار والرغبة فى الانعزال والانسحاب من وعن المجتمع انها تسيطر عليا وتخلينى عايشة فى سجن وخايفة دايمآ من المواجهة ؟
من النهاردة أنا هقول وهتكلم وهعبر عن أحاسيس المعاقين واتمنى انهم يعملوا زيى ويخرجوا من عزلتهم ويتكلموا عن نفسهم بدل ما يسيبوا غيرهم يتحكم فيهم ويسميهم على كيفه ويدرسهم ويعملهم فئران تجارب ويطلع بنتايج مشكوك فيها لأنه مش واحد من المعاقين دول ومستحيل يعرف احساسهم الا اذا كان هوه نفسه معوق زيهم .
اتكلموا بأة.. اتكلموا !!!